Kuelewa kiwango cha kutoa majibu na kiwango cha kukubaliwa

Kwa wengi wenu, kukaribisha wageni ni muhimu, lakini pia mna kazi, familia na maisha yenu binafsi yanayowafanya muwe na shughuli nyingi. Kwa hivyo, kufuatilia jinsi unavyojibu haraka maulizo ya wageni na kufuatilia asilimia ya maombi ya kuweka nafasi unayokubali dhidi ya kukataa labda si muhimu sana katika orodha yako ya mambo ya kufanya. Baadhi yenu mmeuliza kuhusu maelezo ya kina ya vipimo hivi, kwa nini yana umuhimu na jinsi ya kuyaboresha bila ubishi mwingi—na tunafurahi mmeuliza! Tumekusanya majibu kutoka kwa watu ambao huunda zana hizi, kwa hivyo hebu tuyachambue ili tuone wanachosema.

Kuna tofauti gani kati ya kiwango changu cha kutoa majibu na kiwango cha kukubaliwa?

• Kiwango chako cha kutoa majibu hupima jinsi unavyotoa majibu kila wakati ndani ya saa 24 kwa maulizo ya wageni na maombi ya kuweka nafasi. Unaweza kupata kiwango chako cha kutoa majibu kutoka siku 365 zilizopita kwa kubofya kichupo cha Utendaji, kisha kubofya Mahitaji ya Msingi.
• Kiwango chako cha kukubaliwa hupima mara ngapi unakubali au kukataa nafasi zilizowekwa. Maulizo ya wageni hayajumuishwi katika hesabu ya kiwango chako cha kukubaliwa. Unaweza kuona kiwango chako cha kukubaliwa kuanzia siku 365 zilizopita kwa kubofya kichupo cha Utendaji, kisha kubofya Mahitaji ya Msingi.

Kwa kiwango changu cha kutoa majibu, je, ujumbe/maulizo ya kwanza pekee yanatosha au ujumbe unaofuata kwenye uzi ni muhimu pia?
Tunapima tu majibu ndani ya saa 24 tangu ujumbe au maulizo ya kwanza ya mgeni. Ujumbe unaofuata katika uzi huo hauathiri kiwango chako cha kutoa majibu.

Ni nini hufanyika kwa kiwango changu cha kukubaliwa ikiwa nitajibu swali badala ya kuidhinisha, kutoa idhini ya awali, au kukataa ombi la kuweka nafasi?
Jibu fupi ni hili: Ikiwa mgeni atakutumia ombi la kuweka nafasi na unajibu tu swali, lakini usikubali au kukataa kabla ya muda wa ombi kuisha, hiyo inahesabiwa kama kukataa.

Hebu tuichambue zaidi. Ni muhimu kutambua tofauti kati ya maulizo na ombi la kuweka nafasi. Maulizo ni ujumbe tu—labda kuomba kufafanua kitu kuhusu vistawishi, tarehe, au Sheria za Nyumba. Mgeni anaweza kupenda kukaa na wewe na anaweza hata kuuliza kitu kama: “Ninataka kuwekea nafasi nyumba yako; ni sawa nikileta mbwa wangu?” Hili si ombi la kuweka nafasi. Ni maulizo. Unaweza kujibu maulizo kwa kutoa jibu, idhini ya awali, au kwa kukataa. Kukataa maulizo kunaashiria kwa mgeni kuwa mahitaji yake hayafai kwa sehemu yako na kumhimiza aombe tangazo jingine. Lakini hakuna mojawapo ya vitendo hivi kinachoathiri moja kwa moja kiwango chako cha kukubaliwa. Ikiwa umetoa idhini ya awali kwenye maulizo na mgeni awekee nafasi sehemu yako, hiyo inahesabiwa kama kukubaliwa. Ikiwa umetoa idhini ya awali na haweki nafasi, haina athari yoyote kwa kiwango chako cha kukubaliwa. Na ukikataa maulizo, kiwango chako cha kukubaliwa hakiathiriwi.

Ombi la kuweka nafasi linamaanisha kuwa mgeni anaomba rasmi kuwekea nafasi tangazo lako na anasubiri ukubali au ukatae. Kuhusu kiwango chako cha kukubaliwa, tunapima tu matokeo ya mwisho ya ombi la kuweka nafasi na kuna hatua tatu tu unazoweza kuchukua: kukubali, kukataa, au kuruhusu muda wa ombi uishe. Ukiruhusu muda wa ombi uishe—hata ikiwa unajibu maswali lakini huchukui hatua yoyote ya kukubali au kukataa ombi ndani ya saa 24—hiyo inachukuliwa kuwa umekataa.

Je, viwango hivi vinaniathiri vipi kama mwenyeji?
Hilo ni swali zuri. Jibu la kiufundi ni kwamba viwango vya chini vya kutoa majibu vinaweza kuathiri ustahiki wako kwenye mpango wa Mwenyeji Bingwa na viwango vya kukubaliwa vinaweza kuathiri ustahiki wa kuwa mwenyeji wa Plus. Na wenyeji ambao wana viwango vya chini sana wanaweza kukabiliwa na adhabu, ikiwemo kusimamishwa kwa matangazo yao. Lakini ni muhimu kutambua kwamba matukio ya mara moja ya kutojibu au kukataa ombi la kuweka nafasi ni nadra sana kuweza kusababisha hatua yoyote kuchukuliwa. Tuna wasiwasi zaidi pale tunapoona kielelezo thabiti cha kutojibu au kukataa.

Je, unaweza kushiriki vidokezi vya ndani au mapendekezo kuhusu jinsi ninavyoweza kudumisha kiwango cha juu cha kutoa majibu na cha kukubaliwa?
Tunafikiria wenyeji ndio wataalamu katika eneo hili, kwa hivyo tutashiriki baadhi ya maoni yako hapa pia, lakini kwa kiwango cha kutoa majibu, mojawapo ya njia bora za kusimamia ujumbe popote ulipo ni kutumia programu ya Airbnb kwenye simu yako ya mkononi. Unaweza pia kuzingatia kuondoa tangazo lako kwa muda ikiwa unajua kuwa hutaweza kujibu ujumbe kwa muda fulani. Ikiwa unaenda likizo, unahudhuria mkutano wa kikazi wa muda mrefu, au unahitaji kupumzika kwa muda, unaweza kutulia ukijua hakuna saa inayoyoyoma ya kutoa majibu au ujumbe unaorundamana kwenye kikasha chako.

Ili kuondoa tangazo lako kwa muda na kulificha kutoka kwenye matokeo ya utafutaji kwa muda uliowekwa:

1. Nenda kwenye Matangazo yako na uchague tangazo
2. Bofya Maelezo ya Tangazo
3. Karibu na Hali ya tangazo, bofya Hariri
4. Chini ya Hali ya tangazo, chagua Imeondolewa kwa muda kutoka kwenye menyu ya kushuka chini
5. Weka tarehe za kuanza na kumaliza, kisha bofya Hifadhi

Tangazo lako litaamilishwa tena kiotomatiki wakati muda ulioweka unakwisha. Siku moja kabla ya tangazo lako kuamilishwa tena, utapata barua pepe ya kumbusho.

Hapa kuna baadhi ya vidokezi ambavyo wenyeji katika Kituo cha Jumuiya hushiriki ili kudumisha kiwango cha juu cha kutoa majibu:

• Tenga wakati kila siku kujibu maombi na maswali
• Hakikisha kuna mwenyeji mwenza au rafiki atakayejibu kwa niaba yako ikiwa hupatikani na usingependa kuondoa tangazo lako kwa muda
• Okoa muda kwa kuandika majibu ya mapema kwa maswali yanayoulizwa sana. Tafuta kikumbushaji cha "Tumia Ujumbe Uliohifadhiwa" katika uzi wowote wa ujumbe ulio amilifu kati yako na mgeni. Unaweza kutunga, kutumia na kutumia tena majibu yaliyo hapo.
• Ikiwa una shughuli nyingi au biashara yako ya kukaribisha wageni inaanza kupata umaarufu, zingatia kuajiri msaidizi pepe

Kwa kiwango chako cha kukubaliwa, hakikisha kalenda yako na mapendeleo ya kuweka nafasi na mipangilio ni sahihi na imesasishwa. Kwa mfano, ikiwa huwezi kumudu maombi ya siku hiyo hiyo, badilisha tangazo lako ili kuonyesha muda unaohitaji kati ya nafasi zilizowekwa. Wenyeji pia wanatuambia wanaona ni muhimu kuendelea kubadilisha Sheria zao za Nyumba ili wageni waelewe kile ambacho ni sawa na kisicho sawa kabla ya kuwasilisha ombi la kuweka nafasi. Una uwezekano mdogo wa kupata maombi ambayo huwezi kukubali ikiwa umeelezea matarajio yako waziwazi.

Je, Airbnb inafanya nini kuepuka kuadhibu kiwango cha kukubaliwa cha wenyeji wanapokataa maombi yasiyofaa au yasiyo halali?
Tunaelewa kuwa wakati mwingine unaweza kupata maombi ambayo yanakiuka Sheria zako za Nyumba, au ambayo ni majaribio ya uuzaji yaliyofichwa kama maombi ya kuweka nafasi. Hizi zinaweza kukuweka katika hali mbaya ya kuhatarisha kiwango chako cha kukubaliwa wakati hakuna hatua bora ya kuchukuliwa. Ili kuishughulikia, jambo la kwanza tunalohitaji kufanya ni kukusaidia kuiripoti kwetu wakati kuna tatizo. Tunatafuta jinsi tunavyoweza kufanya hivyo na ingawa hatuna huduma ya kutangaza kwa wakati huu, tunafahamu kabisa kero hii inayokusumbua.

Tunataka kuhakikisha umepewa uwezo wa kuamua ni nani unamkaribisha nyumbani kwako na kwamba unaridhika na wageni wanaokaa nawe. Tunaelewa kuwa unataka tu kuwajibika kwa maombi halali ya kuweka nafasi na tumejizatiti kuhakikisha kuwa hiyo inatendeka.

Idadi ni sehemu tu ya hadithi
Ingawa ni vizuri kuzingatia viwango vya kutoa majibu na kukubaliwa, hali hii kwa ujumla si kuhusu vipimo hivi—kwa kweli, ni viashiria tu vya ukarimu halisi unaowaonyesha wageni wako na uhusiano unaoweka wanapowasiliana nawe. Unaathiri uzoefu wa mgeni wako tangu anapowasiliana nawe au kuomba kuweka nafasi na jumuiya ya wenyeji inajivunia sana kuunda uzoefu wa kukaribisha na kujisikia nyumbani kwa watu ambao wanakaa kwenye nyumba zako. Kwa hiyo, ndiyo, tafadhali jali kuhusu kuwasiliana kwa wakati unaofaa na kuweka wageni kwa nafasi nzuri ya kupata mafanikio huku wakijaribu kupata tangazo linalofaa mahitaji yao; lakini ujue kuwa nambari ni njia moja tu ya kuelezea hadithi kuhusu jinsi unavyokaribisha wageni.

Taarifa zilizo ndani ya makala hii zinaweza kuwa zimebadilika toka zilipochapishwa.